Палатаи ҳисоби Ҷумҳурии Тоҷикистон дар нуҳ моҳи сипаригардида дар вазорату идораҳо, марказ ва гурӯҳҳои татбиқи лоиҳаҳои сармоягузорӣ, бонкҳо, субъектҳои хоҷагидорӣ ва дигар муассисаҳои буҷетӣ 117 чорабинии аудиторӣ гузаронда, 22 ҳазору 134 ҳолати вайронкунии қоидаҳои молиявӣ муайян кардааст, ки маблағи умумии онҳо 989,6 млн сомониро ташкил медиҳад.

Ба навиштаи манбаъ, ин нишондод нисбат ба ҳамин давраи соли гузашта 584,6 млн сомонӣ зиёд мебошад.

Гуфта мешавад, ки дар ин давра вайронкунии қоидаҳои низоми молиявӣ дар 19 ҳазору 287 ҳолат ба маблағи 292,0 млн сомонӣ ва вайронкунии қоидаҳои молиявии хусусияти расмидошта дар 2 ҳазору 847 ҳолат ба маблағи 697,6 млн сомонӣ муайян карда шудааст.

Иттилоъ дода мешавад, ки барои бартараф намудани камбудию норасоиҳои муайянгардида, чораҳои мушаххас андешида шуда, вайронкунии қоидаҳои низоми молиявӣ ба маблағи 285,3 млн сомонӣ, аз ҷумла 276, 6 млн сомонӣ ба буҷет ва 8,7 млн сомонӣ ба корхонаҳо барқарор карда шуд, ки 97,7 дарсади маблағи муайяншударо ташкил медиҳад.

Мувофиқи маълумоти дастрас, зарфи нуҳ моҳ Палатаи ҳисоб аз натиҷаи чорабиниҳои аудитории 34 мавод ба маблағи 45,1 млн. сомонӣ барои чораҷӯйӣ ва қабули қарорҳои дахлдор ба мақомоти ҳифзи ҳуқуқ ирсол кардааст.

Ҷиҳати бартараф намудани камбудию норасоиҳои молиявӣ ба вазорату идораҳо, корхонаву муассисаҳо ва марказҳои лоиҳаҳои сармоягузорӣ 30 хулоса ва мактуб бо 839 тавсия ирсол карда шуда, аз баррасии онҳо 27 қарору фармон қабул гардида, 177 нафар ба ҷавобгарии интизомию моддӣ кашида шудаанд.

Dialog.tj