Қосим-Жомарт Токаев дар маҷлиси 37-уми Шурои сармоягузорони хориҷӣ гуфт, ки иқтисоди ҷаҳонӣ дар солҳои наздик бо коҳиши суръати рушди 2,9% рӯ ба рӯ хоҳад шуд. Ба гуфтаи ӯ, фишорҳои таваррум афзоиш ёфта, занҷираҳои ҷаҳонии таъминот халалдор мешавад ва сатҳи ноустуворӣ дар муҳити соҳибкорӣ боло меравад.

Президенти Қазоқистон афзуд, ки бо ба миён омадани чунин равандҳо муколамаи созандаи байналмилалӣ зарур аст. Ба гуфтаи ӯ, бо вуҷуди ин таҳдидҳо Қазоқистон тавонист суботи иқтисодии худро ҳифз кунад. Бар асоси омори расмӣ фақат дар панҷ моҳи аввали соли 2025 маҷмуи маҳсулоти дохилии Қазоқистон 6% афзоиш ёфт. Омилҳои асосии рушд соҳаи нақлиёт ва логистика, сохтмон, савдо ва бахшҳои истихроҷу коркарди маъдан аст.

Қосим-Жомарт Токаев ба навсозии инфрасохтори нақлиётӣ таваҷҷуҳи махсус зоҳир намуда, гуфт, ки то соли 2029 Қазоқистон 11 ҳазор километр роҳи оҳанро аз нав таъмир карда, 5 ҳазор километр роҳи нави оҳан бунёд хоҳад кард.

Президенти Қазоқистон ҳамчунин, гуфт, ки кишвараш дар сафи пеши кишварҳои рақамишуда қарор гирифт. Бино ба арзёбиҳои Созмони Милали Муттаҳид Қазоқистон ба қатори 30 кишвари пешрафтаи рақамӣ шомил мешавад.

Dialog.tj