Расонаҳои қазоқистонӣ аз қавли мақомоти ин кишвар хабар доданд, ки бо далели корҳои таъмир фурудгоҳи байналмилалии Остона дар моҳҳои сентябр ва октябр парвозҳои дохилӣ ва байналмилалиро муваққатан боз медорад.

Маҳдудияти парвозҳо дар майдони ҳавоии Остона ба корҳои таъмир ва азнавсозии фурудгоҳ вобаста аст. Хадамоти матбуоти фурудгоҳ иттилоъ дод, ки бо сабаби гузаронидани корҳои таъмир роҳҳои фуруд ва парвоз дар давраҳои зерин аз 1-ум то 4-уми сентябр, аз 8-ум сентябр то 31-уми октаябр муваққатан баста мешавад.

“Дар санаҳои зикршуда ҳар рӯз аз саоти 10:00 то 18:00 ба вақти Остона роҳ барои парвоз ва фуруд омадани ҳавопаймоҳо дастнорас хоҳад шуд”- зикр шудааст дар иттилоъ.

Корҳои навсозӣ дар доираи хизматрасонии банақшагирифтаи инфрасохтори аэродром гузаронида мешаванд, ки мақсадашон беҳтар кардани амнияти парвозҳо ва баланд бардоштани сифати хизматрасонӣ ба ширкатҳои ҳавопаймоӣ ва мусофирбарӣ мебошад.

Dialog.tj