Имрӯз, дар сафорати Ҷумҳурии Исломии Эрон дар шаҳри Душанбе барои ҳодисаи таркиши бандари Раҷоии Эрон, ки боиси оташсӯзии густурда ва куштаву захмӣ шудани даҳҳо нафар гардид, дафтари ёдбуд баргузор шуд.

Дар маросими ёдбуде, ки бо ибтикори масъулони сафорати Эрон баргузор гардид, намояндагони корпусҳои дипломатии муқими Душанбе, мақомоти расмӣ, чеҳраҳои фарҳангӣ ва ҷомеаи шаҳрвандии Тоҷикистон ширкат намуданд.

Вазири корҳои хориҷии Ҷумҳурии Тоҷикистон Сироҷиддин Муҳриддин ба сафорати Эрон омада, дар дафтари ёдбуди сафорат аз номи давлати Тоҷикистон ва мардум изҳори таслият намуд.

Дар ин маросим чеҳраҳои фарҳанг ва илми тоҷик Каромутулло Олимов, раиси Анҷумани дӯстии Тоҷикистону Эрон, Гулрухсор, Шоири халқии Тоҷикистон, Абдулмумин Шарифӣ, ҳунарманди Тоҷикистон ва дигарон ширкат намуда, изҳори таслияти худро ба мардуми Эрон расониданд. Ҳамчунин, дар ин маросим рӯзноманигорону чаҳраҳои шинохтаи ҷомеаи шаҳрвандӣ низ иштирок намуданд.

Сафирони кишварҳои мухталиф, аз ҷумла сафири Афғонистон, Русия, Арабистони Саудӣ, Туркия, Қазоқистон, Фаластин ва ғайра ширкат намуда, ба мардуми Эрон изҳори ҳамдардӣ намуданд.

Дар маросими ёдбуди қурбониёни ҳодисаи таркиши бандари Раҷоӣ чеҳраҳои шинохта суханронӣ намуда, ба миллати Эрон изҳори тасаллият ва ҳамдардӣ намуданд.

Ҳодисаи таркиши бандари Раҷоӣ 26-уми апрели ҳафтаи гузашта рӯй дод, ки дар натиҷаи ин фоҷеа 70 нафар кушта шуда, беш аз 1200 нафар захмӣ шуданд. Дар пайи ин ҳодиса бархе кишварҳо, аз ҷумла Русия ёрии фаврӣ барои хомӯш кардани оташ расониданд. Президентҳои кишварҳои ҷаҳон, аз ҷумла Русия, Чин, Тоҷикистон, Қазоқистон, Озарбойҷон, Туркия, Арабистони Саудӣ ва ғайра ба президенти Эрон Масъуд Пизишкиён ҳодисаи мазкурро таслият гуфтанд.

Dialog.tj