Бо бозгашти ҳазорон муҳоҷири афғон аз Эрон ва Покистон расонаҳои қазоқистонӣ хабар доданд, ки рӯзи панҷшанбе 36 мошини боркаш, ки 2200 тонна кумакҳои башардӯстона дошт, аз гузаргоҳи Ҳайратон вориди хоки Афғонистон шуданд.

Кумакҳои ирсолшуда иборат аз равғани растанӣ, орд, биринҷ, хаймаҳои тобистона ва зимистонаву кӯрпаҳо мебошад. Қазоқистон ваъда додааст, ки бастаи таҷҳизоти таъҷилии тиббиро низ ба зудӣ ба Афғонистон фиристад.

Азиз Оқбасов, сарпарасти сафорати Қазоқистон гуфт, ки кишвараш аз мардуми Афғонистон ҳимоят мекунад ва ҳадаф дорад, робитаҳои сиёсӣ ва иқтисодиро бо ҳукумати Толибон густариш диҳад.

Ӯ таъкид кард, ки кишвараш мехоҳад дар соҳаҳои маъдан, нақлиёт, логистика ва кишоварзии Афғонистон ҳузур дошта бошад.

Тибқи иттилоъ, Серик Жумангарин, муовини сарвазир ва вазири иқтисоди Қазоқистон қарор аст, аз 21-ум то 23-уми апрел бо як ҳайат аз шаҳри Кобул боздид кунад. Дар ҷараёни ин сафар, ӯ бо мақомоти Толибон мулоқот хоҳад кард. Дар ин шаҳр намоиши маҳсулоти қазоқӣ низ баргузор хоҳад гашт.

Dialog.tj