Имсол шумораи сайёҳон дар Қазоқистон ба таври рекордӣ афзоиш ёфта, ба 10,5 миллион нафар расид, ки нисбат ба соли 2024 900 ҳазор нафар бештар аст.

“Дар умум, ба кишвари мо 15,3 миллион меҳмони хориҷӣ омадаанд. Дар ин шумора, онҳое ки барои кор ё зиндагии доимӣ омадаанд, ҳисоб нашудааст. Аз миёни онҳо 10,4 миллион нафар, беш аз як рӯз дар Қазоқистон иқомат кардаанд. Мо онҳоро ба ҳайси сайёҳони хориҷӣ қабул мекунем. Ҳамаи онҳое, ки барои истироҳат, сафари хизматӣ, ширкат дар конфронсҳо ё ба дидани дӯстон ва хешовандон омадаанд, ҳамчун сайёҳ ба қайд гирифта мешаванд. Зеро онҳо ба кишвари мо омада, ба иқтисодиёти мо таъсири мусбат мерасонанд”- гуфт Ербол Мирзобосинов, вазири сайёҳӣ ва варзиши Қазоқистон.

Ербол Мирзобосинов таъкид кард, ки аз 10 миллион нафар сайёҳ, 9 миллиони онҳо дар ҷойҳои расмии иқомат сатби ном нашудаанд.

“Дар ҳоли ҳозир омори меҳмонони хориҷӣ, бо истифода аз иттилооти Хадамоти марзбонии Кумитаи амнияти миллӣ таҳия мешавад. Ин дар ҳолест, ки маълумот оид ба сайёҳии дохилӣ бар асоси сабти ҷойҳои истиқоматӣ аст. Аз ин рӯ, барои такмил додани низоми омор ва сабти сайёҳон чунин тадбирҳо пешниҳод мешавад. Барои ба таври дақиқтар арзёбӣ намудани ҷараёни сайёҳӣ бояд Бюрои миллии омор ба маълумоти операторони мобилӣ дастрасӣ дошта бошад. Илова бар ин, барои таҳлили саҳми иқтисодии сайёҳон лозим аст маълумот дар хусуси хароҷоти онҳо ба воситаи кортҳои бонкӣ низ бошад” – гуфт вазир Ербол Мирзобосинов.

Қаблан, Вазири сайёҳӣ ва варзиши Қазоқистон Ербол Мирзобосинов дар хусуси дурнамои рушди сайёҳӣ дар Қазоқистон иттилоъ дода буд.

Dialog.tj