Мирвайсхон, ҷияни Солеҳ Муҳаммади Регистонӣ ва фармондеҳи Ҷабҳаи муқовимати миллии Афғонистон рӯзи 18-уми  октябр то охирин тир бар зидди Толибон ҷангида, кушта шудааст.

Мирвайсхон чанд рӯз қабл аз кушта шуданаш дар як навори видеоӣ гуфта буд, ки дар кӯҳҳои Ҳиндукуш қарор дорад ва бар зидди Толибон муборизаи мусаллаҳонаро идома медиҳад.

Мирвайсхон ҷияни Солеҳ Муҳаммади Регистонӣ, раиси умумии Ситоди низомии Ҷабҳаи муқовимати миллии Афғонистон буд. 

Баъди нашри хабари марги Мирвайсхон чандин чеҳраҳои сиёсӣ ва мухолифони гурӯҳи террористии Толибон дар шабакаҳои иҷтимоӣ вокуниш нишон доданд.

Холид Амирӣ, яке аз фармондеҳони баландпояи Ҷабҳаи муқовимати миллии Афғонистон дар паёме навишт, кушта шудани муборизон азми ин гурӯҳро барои расидан ба озодӣ аз миён намебарад.

Муниб Амирӣ, фармондеҳи дигари ҷабҳа гуфт, марги фармондеҳон муборизаро ба поён намерасонад, балки иродаи неруҳои муқовиматро барои идомаи роҳ устувор мекунад.

Макони кушта шудани Мирвайсхон дақиқ нест. Бархе гуфтаанд, ки ӯ дар Бағлон кушта шуд ва бархеи дигар гуфтаанд, ки ӯ дар Панҷшер кушта шуд.

Як саҳифаи фейсбукӣ, ки ахбори вобаста ба муборизаи Ҷабҳаи муқовимат бар зидди гурӯҳи террористии Толибонро нашр мекунад, навишт ӯ дар қароргоҳи падариаш дар Порандеҳ кушта шудааст.

Толибон дар расонаҳои худ навори ҷасади ӯро нашр кардаанд. Бархе корбарон бо дидани навори ҷасади ӯ гуфтаанд, ки ӯ то охирин лаҳза мубориза намуда, силоҳро бар замин нагузошааст.

Аҳмад Масъуд, раҳбари Ҷабҳаи муқовимати миллии Афғонистон дар бораи кушта шудани ӯ изҳороти расмӣ надодааст.

Ҷабҳаи муқовимати миллии Афғонистон беш аз панҷ сол боз бар зидди Толибон меҷангад ва неруҳои ин ҷабҳа аз Панҷшер то Бағлону Нуристон ва Кобул бар зидди ин гурӯҳ ҳамлаҳо анҷом медиҳанд.

Dialog.tj