Раёсати Вазорати корҳои дохилӣ дар шаҳри Душанбе аз боздошти ҷавоне хабар дод, ки ба муомилоти ғайриқонунии воситаҳои нашъадор гумонбар аст.

Манбаъ навиштааст, ки дар натиҷаи амалисозии чорабиниҳои оперативӣ-ҷустуҷӯӣ аз ҷониби кормандони ШВКД-1 дар ноҳияи Сино, Шакарбеков Шоҳрӯз, шаҳрванди 28-солаи яке аз кишварҳои ҳамсоя, бо гумони муомилоти ғайриқонунии воситаҳои нашъадор дар ҳудуди шаҳри Душанбе дастгир карда шуд.

Гуфта мешавад, ки зимни кофтуков дар ҷойи ҳодиса аз номбурда 53 адад бастаи полиэтиленӣ, ки дар дохили онҳо маводи нашъадори навъи «метамфетамин» (кристалл) мавҷуд буд, дарёфт карда шуд. Инчунин, зимни азназаргузаронии манзили ба иҷора гирифтаи ӯ, воқеъ дар кӯчаи Р. Набиев, 292 грамм маводи нашъадори навъи «метамфетамин» (кристалл) дарёфт гардид.

Иттилоъ дода мешавад, ки дар маҷмуъ, аз гумонбаршуда 386 грамм маводи нашъадори навъи «метамфетамин» мусодира карда шуд.

Афзуда мешавад, ки вобаста ба ҳолати мазкур, нисбат ба дастгиршуда бо моддаи 200 Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишоти пешакӣ идома дорад.

Dialog.tj