АМИТ “Ховар” бо такя ба маълумоти Раёсати Вазорати корҳои дохилӣ дар шаҳри Душанбе хабар медиҳад, ки дар доираи амалиёти шартии “Тасмаи бехатарӣ” ва “Скутер” нисбат ба 1250 нафар барои истифода накардани тасмаи бехатарӣ ва нисбат ба 60 ронандаи дучарха ва скутер бо моддаи 333-и Кодекси ҳуқуқвайронкунии Ҷумҳурии Тоҷикистон санади маъмурӣ тартиб дода шуд.

Манбаъ меафзояд, ки дучарха ва скутерҳои ронандагоне, ки қоидаҳои ҳаракат дар роҳро дағалона вайрон кардаанд, дар ҷаримагоҳи муваққатӣ нигоҳ дошта мешаванд.

Гуфта мешавад, ки соли равон дар кишвар аз ҷониби ронандагони мототсикл ва скутерҳо 140 ҳодисаи нақлиётӣ ба қайд гирифта шудааст, ки бар асари он 51 нафар ба ҳалокат расида, 122 нафари дигар ҷароҳати ҷисмонӣ бардоштаанд.

Иттилоъ дода мешавад, ки аз 15-ум то 25-уми сентябри соли равон бо мақсади баланд бардоштани маърифатнокии шаҳрвандон оид ба риояи қоидаҳои ҳаракат дар роҳ ва пешгирии ҳодисаҳои роҳу нақлиёт дар шаҳри Душанбе амалиёти шартии “Тасмаи бехатарӣ” ва “Скутер” гузаронида шуд.

Dialog.TJ