Дар вилояти Хатлон дар панҷ моҳу 15 рӯзи ахир 49 ҳодисаи ғарқ шудани сокинон ба қайд гирифта шудааст. Дар ин бора Раёсати Вазорати корҳои дохилии вилояти Хатлон хабар додааст.

Бар асоси гуфтаи масъулин сабаби асосии ҳодисаҳои ғарқшавӣ риоя накардани қоидаҳои шиноварӣ ва оббозии беэҳтиёткорона, бахусус дар маҳалҳое мебошад, ки барои шиноварӣ манъ ва хатарзо дониста мешавад. Бештари ҳалокатҳо дар обанборҳо, кӯлҳо, каналҳо ва дарёҳо ба қайд гирифта шудаанд. Ин маконҳо аксаран аз назари сокинон ва ниҳодҳои наҷотдиҳанда дур мемонанд.

Мақомоти милитсияи вилоят бо мақсади пешгирии ҳодисаҳои ғарқшавӣ амалиёти махсусро бо номи “Наҷот” роҳандозӣ кардаанд. Дар доираи он, кормандони милитсия, бахусус масъулини мубориза бо қонуншиканӣ миёни наврасону ҷавонон, ба минтақаҳои обии хатарнок сафарбар шуда, корҳои фаҳмондадиҳӣ ва огоҳисозиро дар миёни сокинон анҷом медиҳанд.

Мақомот аз падару модарон даъват мекунанд, дар фасли тобистон, ки шумораи истироҳаткунандагон дар соҳили дарё меафзояд, фарзандони худро дар вақти оббозӣ зери назорати қатъӣ қарор диҳанд. Таҷрибаи солҳои гузашта нишон додааст, ки қисми зиёди қурбониён ноболиғонанд, ки бо сабаби набудани назорат ва надоштани маҳоратҳои кофии шиноварӣ дар об ғарқ мешаванд.

Dialog.tj